Tava pula va pewa eeproyeka dounamapya 

KUNENE- Oshiwana shavaHimba moshitopolwa shaKaoko  osho sha talika ko kutya oshi li konima yefiya osha lombwela Omupedupresidente Lucia Witbooi kutya osha hala okupewa edu osho yo eeproyeka dounamapya nalalakano lokuninga oikunino yavo.

Oshiwana natango osha lombwela Witbooi kombinga yomashongo a yooloka ngaashi: eembola dimwe dina omeva alula, ovanafikola hava ende eendjila diledile okuya keetundi, eepate dii nosho tuu. Oshivike sha dja ko, Witbooi okwa telela po oikandjohoololo ya yooloka osho yo eefikola nombelewa yangoloneya waKunene. Okwa li natango a ninga omutumba nomalelo opamifyuululwakalo a yooloka omoKunene okukundafana nghene epangelo ta li kwafa oshiwana eshi.

Oshitukukwa shaKunene osho shimwe sha didilikwa shi na omwaalu muhapu wovanhu ovo va talika ko ve li konima yefiwa noha va mono okwafo okudilila kepangelo.

Omupedupresidente okwa ti ombelewa yaye oi na oshinakuwanifa shokutelela po oshiwana sha dja momuhoko wovanhu ve li konima yefiya koitukulwa ya yooloka osho yo okukwashipaleka kutya ovanhu ova pewa omakwafo okudilila mombelewa yaye.

Uerieta Efraim a dile komukunda Otjindjasemo okwa ti ngeenge ova pewa eeproyeeka dounamapya otashi ka  kwafele opo  va kale tava longo oikulya yavo vene.

“Nafye okwa hala okukala hatu longo oikulya yetu vene ngaashi naana omihoko dimwe po da yooloka hadi pewa eeproyeka kepangelo, nelalakano lokulwifa ondjala noluhepo,” ta ti.  Ounamapya owa fimana molwaashi ohau kwafele okuyambula po eliko loshilongo.

Efraim okwa ti natango otashi ka eta po eemhito doilonga unene tuu kovanyasha.

Okwa ti ovena nale eenhele domadu da wana okuninga oikunino.

Uakendisa Manuel a dile komukunda Ehonba okwa popya ta ti ovena oupyakadi womboola yavo hai di omeva alula.

Okwa pula epangelo opo li tungile omboola imwe molwaashi paife otava mono oixuna yokumwa omeva alula osho shi sha nyika oshiponga. Ngatukumbe Murumbua okwa pula epangelo opo li yandje oyeendifo okukala tai twala ounona vavo keefilola molwaashi ohava ende oshinano shile.

Natango, Oshiwana osha lombwela Omupresdiente kombinga yovaleli vavo ihava fiki komikunda davo.  Lwopokati opo, oshiwana osha lombwela Witbooi kutya osha pandula oilonga ya longwa kepangelo ngaashi okueta omeva nolusheno pomukunda Otjomuru. Pomukunda Otjomuru ope na ofikola i na omuhandjofikola nokapangelo kena olusheno, naashi otashi ulike kutya epangelo ota li longo nelitulemo okutwala omayakulo popepi noshiwana.

Omupedupresidente Witbooi okwa popya ta ti okwa didilika omashongo ayeshe a lombwelwa koshiwana.

“Ohandi ka kundafana nombelewa yange ndele hatu tula oinima aishe moilonga. Elalakano lange okufika punye ndele handi pwiliki omaupyakadi eni,” ta ti.

-fhamalwa@nepc.com.na 

The post Tava pula va pewa eeproyeka dounamapya  appeared first on New Era.