Oimaliwa yeependjela nomakwashilipaleko oyo inai kufwa ko nai konakonwe – Aupindi

Oshilyo shopaliamente shoSwapo Tobie Aupindi okwa pula kuningwe omakonakono opashiwana eemiliona deependjela, omakwashilipaleko, omafyo nomauwa akwao opashimaliwa oo inaa yandjwa natango koovene.

Aupindi osheetwapo eshi okwa li e shi eta po mOmutumba wOpashiwana Etivali, ta ti kutya ovanailonga vakulu, ovafiyekadi, eefiye, ovakulupe neefamili otadi twikile nokumona oixuna pamaxupilo omanga omahangano e na oimaliwa yavo.

Okwa popya kutya omauwa opendjela oo inaa kufwa ko aa koya peemiliona di li N$218, she likolelela komuwiliki woshikondo shoshimaliwa, omanga omwaalu aushe woimaliwa oyo inai kufwa ko i li komahangano eependjela, omahangano omakwashilipaleko, Guardian’s Fund nomahangano akwao otashi dulika wa koya po neenghono opo.

“Oovene vomauwa vahapu kave shii kutya oku na omauwa avo molweesystema da nghundipala, ouyelele ukulukulu, eshiivo loshiwana la ngabekwa nomainda opambelewa, unene ngaa mokati koshiwana shokomikunda naasho shi na oiyemo i li pedu,” osho a ti ngaho.

Okwa holola omalimbililo kutya omahangano otaa twikile okutuvikila nokumona oiyemo okudja moimaliwa ei omanga oovene vayo tava mono oixuna ngaashi yokulanda oikulya, omalukalwa, ehongo nomayakulo opaundjolowele.

Oshikundafanwa otashi ti kutya omauwa aa inaa kufwa ko aa lyatela pedu ouyuki wopanghalafano, elineekelo loshiwana moshikondo shoimaliwa nomaufemba ovakwashiwana okumona omaliko paveta.

Mokati koinima oyo tai pulwa omwa kwatelwa olopota yomavalulo yomauwa aeshe oo inaa yandjwa, ndele oindjemo tai lopotelwa opaliamente.

Aupindi ota pula oveta ya kola i xwepopeke okukonga oovene vomauwa aa, elongo lopauyelele nekalelepo loinima, mwa kwatelwa omahandukilo a nyaya komunhu taa tulilwa po omahangano oo a dopa okuwanifa po oveta.

Oshikundafanwa natango otashi pula kutotwe omilandu dokukonga oovene vomauwa tadi dengele.

The post Oimaliwa yeependjela nomakwashilipaleko oyo inai kufwa ko nai konakonwe – Aupindi appeared first on The Namibian.