Eenghendabala dokuyambidida ovanafaalama odi li metifa – Masake
Omupedu minista wounamapya nounaimuna, eeshi, omeva nomatendululo omadu, Ruthy Masake, Etinano okwa udaneka eyambidido lovanafaalama opo kukandulwe po omikundu dakeshe efiku, okupitila meenghendabala da yooloka. Eshi kwa li ta popi komaulikilo oipindi kOpuwo Olomakaya, Masake okwa popya kutya eenghendabala edi oda kwatela mo okuyambula po eenhele domeva, okunghonopeka omayakulo oundjolowele woimuna nokuxwaxwameka ounamapya nounaimuna tau […] The post Eenghendabala dokuyambidida ovanafaalama odi li metifa – Masake appeared first on The Namibian.
Black News 
Omupedu minista wounamapya nounaimuna, eeshi, omeva nomatendululo omadu, Ruthy Masake, Etinano okwa udaneka eyambidido lovanafaalama opo kukandulwe po omikundu dakeshe efiku, okupitila meenghendabala da yooloka.
Eshi kwa li ta popi komaulikilo oipindi kOpuwo Olomakaya, Masake okwa popya kutya eenghendabala edi oda kwatela mo okuyambula po eenhele domeva, okunghonopeka omayakulo oundjolowele woimuna nokuxwaxwameka ounamapya nounaimuna tau wa palele onghalo yomhepo, kovanafaalama ovo opo tava ye vopangeshefa naavo vashona.
Okwa ti kutya luhapu ovanafaalama ohava kala va taalela omikundu ngaashi oshikukuta, omumbwe yomeva neemhito dokungeshefa da ngabekwa, osho hashi kumu nai neenghono okulikola nomaxupilo.
Onghee nee opu na omumbwe yoshikondo sha nghonopekwa ku vatelwe ovanafaalama va dule okuya komesho nawa.
Oshitopolwa shaKunene natango oshi na oshiwana sha tala unene mounafaalama woimuna nounongo wopamufyuululwakalo opo shi xupe monghalo yomhepo i nyanyaleka, osho a ti ngaho.
Okwa yeleka yoo vali efimano lokuyambula po oshikondo shokulonga oikulya yoimuna opo kukelelwe ondjala nokukwashilipaleka ounafaalama woimuna tau twikile moshitopolwahoololo.
“Oipindi yaalushe ohai tameke nokulikola kuwa, ndee ovanafaalama nava yambididwe ndee tava kwatakanifwa neemhito doipindi opo kuhangwe eyokomesho leliko la kwatela mo aveshe,” osho a ti ngaho.
Masake okwa indila elongelokumwe lakola pokati kepangelo, oshikondo shopaumwene noshiwana, manga yoo ta tu ovanyasha omukumo va kufe ombinga va manguluka mounamapya nounaimuna shaashi ou li odjo ya kula yoilonga nounangeshefa.
Omuyandjimayela kamana koFeedmaster, Frank Kanguatjivi, moshipopiwa shaye, okwa ti ovanafaalama ova pumbwa okutota po omilandu dopombada dokuwilika oimuna ngaashi okudidilika oimuna nawa, mwa kwatelwa omafiku omadalo noihako, opo va yambule po okulikola nomafaneko, nosho yoo okuyambidida okuninga omatokolo e li xwepo.
Ovanafaalama, okwa ti, nava tameke okulongekida nokulanda oikulya yoimuna diva, ta yeleke kutya oimuna ya palwifwa nawa otai dulu okulandifwa noupu, unene ngaa poivilo ngaashi oipindi yopaunamapya nounaimuna, oko ovanafaalama ve na eemhito diwa dokulandifa keendado di li xwepo.
The post Eenghendabala dokuyambidida ovanafaalama odi li metifa – Masake appeared first on The Namibian.
