Inandi kufa ombinga momangela yekengelelo laSanlam – Kudumo
Ndokotola oo kwa li te lideula moshipangelo shaNandjokwe Kelsey Kudumo (32) okwe likala kutya ina kufa ombinga momangela yekengelelo lomakwashilipaleko koSanlam. Omangela ei oya kwatela mo okuninga eelopota dopaunamiti noidjemo yolabolatoli paumbudi noyakengelelifa ehangano eemiliona di dulife poN$2.1. Kudumo okwe likala pefimbo loihokolola yaye yobooloha momhangu yamangestrata mOndangwa Etitatu. Epangelo ola ti kutya Kudumo okwa […] The post Inandi kufa ombinga momangela yekengelelo laSanlam – Kudumo appeared first on The Namibian.
Black News 
Ndokotola oo kwa li te lideula moshipangelo shaNandjokwe Kelsey Kudumo (32) okwe likala kutya ina kufa ombinga momangela yekengelelo lomakwashilipaleko koSanlam.
Omangela ei oya kwatela mo okuninga eelopota dopaunamiti noidjemo yolabolatoli paumbudi noyakengelelifa ehangano eemiliona di dulife poN$2.1.
Kudumo okwe likala pefimbo loihokolola yaye yobooloha momhangu yamangestrata mOndangwa Etitatu.
Epangelo ola ti kutya Kudumo okwa li umwe womwaavo va kufa ombinga mekengelelo loshimaliwa shekwashilipaleko, eshi a yandja oidjemo yokolabolatoli okudja koNamibian Institute of Pathology nokunduluka eelopota dopaunamiti doipupulu.
She likolelela komhangu, oimaliwa yekwashilipaleko oyo ya kengelelwa tete oi fike pomiliona oshinghwanyu hetatu, ashike omakonakono aa ka holola kutya oimaliwa aishe kumwe ei ya kengelelwa oya koya peemiliona N$2.1.
Omutamaneki wepangelo Erastus Christiana, okwa lombwela omhangu kutya Kudumo vati okwa longela kumwe noondokotola vopaunamiti Fillemon Nakanduungile naVarela Gomes, omupangi mukulu mOnandjokwe Festus Amwaalwa, omuleli wongudu yovafufi Abner Mateus navakwao ve li o-16 va kengelele Sanlam Namibia.
Epangelo natango ola ti kutya Kudumo okwa kufa ombinga mekengelelo eli la kwatakanifwa naMateus.
Omikanda domhangu oda holola kutya oidjemo yokolabolatoli yaElizabeth Elifas okwa li vati ya longifwa ya fa yaClaudia Martin muDesemba 2024 opo va dule okupula oshimaliwa shekwashilipaleko kehangano.
Epeko lopolifi natango ola holola kutya Kudumo okwa yandja oidjemo yohonde neelopota dopaunamiti da puka ndee ta kufa omunaudu woshili ohonde opo a ninge ouyelele uhe li mondjila wopaunamiti, oo wa ka longifwa okukengelela ehangano.
Christiana natango okwa lombwela omhangu kutya Kudumo vati okwa mona oshimaliwa shi fike poN$18 000 okudja momangela omu.
Ashike nee, Kudumo okwe likanyuna ndee ta lombwele omhangu kutya oshimaliwa eshi a pewa okwa li ashike a vatelwa kuAmwaalwa oo a ti kutya okaume kaye.
“Onde mu pula oshimaliwa ndi fute eengunga. Inandi popya kutya okwa li nda pumbwa ingapi, ashike okwa pange nge oN$18 000 ongakaume,” osho a ti ngaho.
Eshi a pulwa kuChristiana kutya okwa li ta ka futa eengunga dashike noimaliwa oyo, Kudumo okwa ti ita dimbuluka vali.
Epangelo ole mu lombwela kutya oimaliwa okwa li vati olupandu eshi a kufa ombinga momangela yekengelelo.
Kudumo okwa nyamukula: “Itandi ti ko sha.”
Okwe likala vali kutya ina longela kumwe novatamanekwa ndee ta ti vamwe ke va shii nokuli.
“Kandi na ondjo noho inandi longela kumwe novanhu ovo taku tiwa onda longela kumwe navo shaashi ovatamanekwa vamwe moshipofa omu nghi va shii,” osho a lombwela omhangu ngaho.
Christiana okwa lombwela omhangu kutya Kudumo vati okwa li moSouth Africa pefimbo oshiningwanima sha ningwa.
Kudumo okwa indila omhangu i mu pe obooloha opo a mane okuninga omadeulo aye opaunamiti ndee ta tameke oilonga yaye.
Okwa ti kakwa li ta mono ondjabi pefimbo lomalideulo nota dulu ashike okufuta obooloha yoshimaliwa shi fike poN$5 000 nevatelo lovakulunhu vaye.
Kudumo okwa ti kutya ita faduka po, ndee ta lombwele omhangu kutya omukanda waye wokundja mo moshilongo owa kwisha nale momudo 2022.
Oku na ouhongelwe wounamiti nomatando okudja koshiputudilo shi li moChina.
The post Inandi kufa ombinga momangela yekengelelo laSanlam – Kudumo appeared first on The Namibian.
