Omupolisi a dhipaga kalyamupombo ngoka a fegula omuntu ongodhi yopeke

Omulumentu gwomimvo 26 okwa hulithile moshipangelo konima sho a yahwa komupolisi mOshakati sha ningwa Etine lyoshiwike sha zi ko sho taku hokololwa kwa li ta fadhukapo nongodhi ndjoka a fegula omukwashigwana.

Oshiningwanima shoka osha kolekwa kukomanda gwopolisi yoshitopolwa shaShana, komufala Andreas Shilelo, mEtitatu.

Otaku hokololwa oshiningwanima shoka sha ningilwa pomatungilo goositola dhEtango Complex sho aakwigwana ya tokola okutidha omufekelwa ngoka, a hololwa kutya oye Titus Titus.

Shilelo okwa popi kutya omupolisi, ngoka a adhika nokuli e li miilonga, okwa tsakanene noshigwana sha tidha omufekelwa nolwanima okwe mu umbu noku mu yaha.

Omupolisi ngoka ina tulwa miipandeko, ashike Shilelo okwa popi kutya oshiningwanima shoka oshi li kohi yomakonakono osho wo omilandu dhopaveta.

Pauyelele wa gandjwa kuShilelo, omufekelwa manga inaa yahwa okwa li a ningi onkambadhala yoshikoya shotango sho taku hokololwa a pula omupolisi gwamuni gwaShakati ongodhi ye yopeke opo a dhenge ko.

Omanga e na ongodhi, Titus okwa yi mongodhi ndjoka nokukutha mo oPIN yoE-wallet, ndjoka lwanima a tumine kongodhi ye.

Otaku hokololwa kutya omupolisi ngoka gwamuni, okwa dhimbulula uulingilingi mboka nokwa kutha ko ongodhi ye komufekelwa.

Okuza mpoka omupolisi ngoka gwamuni opamwe naakwashigwana oya kwata omulumentu ngoka nelalakano lyoku mu fala koshitaasi shopolisi.
Ashike nando ongaaka, Titus okwe shi pondola okwiinaga mo nokwa fadhukapo.

Konima ashike yominute 11, otaku hokololwa Titus a yi pomukwashigwana gulwe noku mu yakula ongodhi nokwa fadhukapo.
Omanga ta fadhukapo a homata ombele ye, aakwashigwana oya tokola ye mu tidhe.

Shilelo okwa popi kutya omanga Titus a tidhwa okwa tsakanene nomupolisi ta zi komeho.

Omupolisi okwa ningi onkambadhala yokuthikameka omufekelwa ngoka, ashike ina pulakena ko hoka nonkene okwa tsikile okutondoka.

“Omupolisi okwa kutha mo ondjembo nokuumbu omufekelwa,”osho Shilelo a popi ngaaka.

Titus okwa kwatwa koholo nokwoongotele molwashoka okwa li e ehamekwa noonkondo.

Okwa falwa koshipangelo nolwanima okwa hulitha.

Ongodhi ndjoka a li a yugu omukwashigwana okwa adhika nayo, osho Shilelo a popi ngaaka.

Komanda okwa popi kutya Titus okwa tseyika nawa mondolopa ongagumwe gwomwaamboka haya longo iimbuluma mwa kwatelwa wo nuukengeleledhi.

Shilelo okwa popi kutya uuyelele kombinga yeyaho ndyoka otawu longithwa mokuninga omakonakono nepeko otali ka gandjwa kompangu yi ninge etokolo lyoshipotha shoka.

“Ompangu otayi ka ninga etokolo, nuuyuuni otawu ka kala wa longwa,”osho Shilelo a popi ngaaka.

“Otaku ka ningwa iihokolola, ngiika otamu ka za etokolo lyomompangu.

Ompangu oyo tayi ka ninga etokolo. Epeko otali otali ka gandjwa kompangu opo omuntu ye kompangu,”osho Shilelo a popi ngaaka.

Shilelo okwa dhenge wo omuthindo kesimano lyegameno lyaakwashigwana osho wo omaliko gawo, nokwa popi kutya aakwashigwana mongashingeyi oya lulilwa noonkondo kiinima yawo tayi yakwa po osho wo iiningwanima yilwe ya vuka yiimbuluma.

Petameko lyomwedhi nguka, omupolisi Wilhelm Simon (34) okwa tulwa miipandeko sho kwa li a yaha omulumentu pondingosho tayi adhika mOshakati.

Otaku hokololwa kutya oontamanana okwa li dha tukuka pokati ke nomulumentu gulwe nokwa kutha mo ombistoli ye noku umba, ashike pamupya oholo oya kwata gulwe gwomwaamboka ya li pondingosho ndjoka.

Nakuninga oshihakanwa kali nande oshitopolwa shoontamanana ishewe Simon okwa li mefudho pethimbo lyoshiningwanima shoka.

Omufekelwa okwa li a tindilwa oboloha nota tamanekelwa oshipotha shonkambadhala yedhipago, uuhasha wokulongitha ondjembo osho wo okuumba momudhingoloko gwondolopa.

The post Omupolisi a dhipaga kalyamupombo ngoka a fegula omuntu ongodhi yopeke appeared first on The Namibian.