Ondjokonona nai kwatelwe po – Steenkamp
Minista wehongo, omaduto oinima ipe, ovanyasha, omaudano, omaunghulungu nomifyuululwakalo, Sanet Steenkamp, okwa pula ondjokonona yekondjelo manguluko laNamibia i kwatelwe po nokushangwa opo kukwashilipalekwe kutya oshiwana shokomongula oshe i mona. Omapopyo aa Steenkamp okwe a popya Etivali pefimbo leyandjo loumbo ve li o-400 tava hokolola ondjokonona yonghalamwenyo yomukokoli presidente woshilongo, Sam Nujoma, keefikola nokeengulumambo oshilongo ashishe. […] The post Ondjokonona nai kwatelwe po – Steenkamp appeared first on The Namibian.
Black News 
Minista wehongo, omaduto oinima ipe, ovanyasha, omaudano, omaunghulungu nomifyuululwakalo, Sanet Steenkamp, okwa pula ondjokonona yekondjelo manguluko laNamibia i kwatelwe po nokushangwa opo kukwashilipalekwe kutya oshiwana shokomongula oshe i mona.
Omapopyo aa Steenkamp okwe a popya Etivali pefimbo leyandjo loumbo ve li o-400 tava hokolola ondjokonona yonghalamwenyo yomukokoli presidente woshilongo, Sam Nujoma, keefikola nokeengulumambo oshilongo ashishe.
Oumbo okwa li va yandjwa komunashipundi wewilikongudu loshifokundaneki shoNew Era John Sifani nomukalelipo shilongo waChina moNamibia Zao Weiping.
Omaano okwa endela pamwe nefiku ledalo laNujoma, 12 Mei, olo hali dimbulukiwa ongoNujoma Day noNational Planting Day.
“Opu na omahokololo ahapu natango inaa shangwa kombinga yaavo va kondjela emanguluko letu,” Steenkamp ta ti.
Okwa ti eengulumambo natango oda fimana mokuyandja omauyelele kounona, ovanyasha, ovapekapeki noshiwana ashishe koonono.
“Eengulumambo detu natango odo ashike eedjo douyelele dotete, nomafimbo amwe odo ashike nokuli eedjo domauyelele dovanhu vetu,” osho a ti ngaho.
Eshi kwa li ta popi poshivilo apa, omunashipundi woSam Nujoma Foundation, Nahas Angula, okwa pula ovalongi vomeengulumambo opo va twe ounona omukumo va leshe okambo aka.
“Eshi okambo aka taka ende neefikola, ondi na etelameno kutya itaka i ashike oko ndee taka kala ashike ke li omo itaka leshwa.
Omalungula otaa kufa ombinga, ndee ounona ovo otashi dulika vaha tale ko nokuli kuko.
Va lombweleni ve ka leshe. Oshi li mouwa wavo vene,” osho a ti ngaho.
Kombinga yaye, Sifani okwa holola elineekelo kutya otaka ka longifwa meefikola notaka ka tulwa meengulumambo oshilongo ashishe.
Eshi kwa li ta popi ponhele yombelewa youkalelipo shilongo waChina, ambassada Weiping okwa ti omaano aa otaa kwashilipaleke kutya ovanyasha vaNamibia ova mona ondjokonona yoshilongo novakondjeli manguluko vayo.
Embo okwa li la patululwa pambelewa mOvenduka muJuni odula ya dja ko, komupresidente mukulu Nangolo Mbumba.
The post Ondjokonona nai kwatelwe po – Steenkamp appeared first on The Namibian.
