Ovakwapata vaSeibeb ova hala ouyelele we lixwa po
Ovakwapata vaGiano Seibeb (29), oo ta tamanekelwa okulivakela mEumbo lEpangelo mOvenduka oshivike sha dja ko, otava pula va ulikilwe kutya okwa ya mo ngahelipi. Oshiningwanima eshi osha eta presidente Netumbo Nandi-Ndaitwah a kufe moilonga komufalandjai wopolifi Joseph Shikongo molweameno la nghundipala. Mumwaina waSeibeb, Melani Seibes (28), Etitatu okwa lombwela oThe Namibian kutya ofamili yaye oya […] The post Ovakwapata vaSeibeb ova hala ouyelele we lixwa po appeared first on The Namibian.
Black News 
Ovakwapata vaGiano Seibeb (29), oo ta tamanekelwa okulivakela mEumbo lEpangelo mOvenduka oshivike sha dja ko, otava pula va ulikilwe kutya okwa ya mo ngahelipi.
Oshiningwanima eshi osha eta presidente Netumbo Nandi-Ndaitwah a kufe moilonga komufalandjai wopolifi Joseph Shikongo molweameno la nghundipala.
Mumwaina waSeibeb, Melani Seibes (28), Etitatu okwa lombwela oThe Namibian kutya ofamili yaye oya uda ashike oshiningwanima eshi Etivali komalungula konima kwa li a holoka momhagu oshikando shotete.
Ofamili natango otai pula epangelo li popye kutya Seibeb okwe livaka mo ngahelipi moshipangelo shovanhu ovo ve na oupyakadi wopamadilaadilo mOvenduka, omo a kala eli manga oshiningwanima inashi ningwa.
“Ongovakwapata vaSeibeb, otwa hala okumona kutya okwa ya mo ngahelipi mEumbo lEpangelo; otwa hala okumona okavidio, shaashi ita dulu ashike okupewa ehandukilo puhe na oumbangi.
“Otwe mu lopota kutya okwa kana kopolifi kOtjomuise momafiku 05 Apiilili, ashike inatu mona nande evatelo la sha lokumona opo e li,” Seibes ta ti.
Omupopiliko wombelewa yapresidente Jonas Mbambo okwa ti ombelewa itai ti ko sha koshikumungu eshi shaashi oshi li komhangu.
“Opu na eyooloko leenghono, oshiningwanima eshi paife oshi li momhangu, oko omakonakono a wedwa po taa ka ningwa,” osho a ti ngaho.
Seibeb okwa teelelika a ka ningilwe omakonakono opamadilaadilo kutalike ngee ota dulu ngaa okuya komesho noihokolola yomhangu.
Eshi osha indilwa shi ningwe kumangestrata Eliuda Nakulonda momhagu Etivali.
A LOPOTWA A KANA
Ofamili yaSeibeb oya lopota omunhu wayo a kana komalungula momafiku 21 Apilili, tai pula oshiwana shi vatele mokukonga omukwapata wayo konima Seibeb vati e livaka moshipangelo shovanhu ovo ve na oupyakadi wopamadilaadilo Etitatu loshivike sha dja ko.
Seibes okwa ti ofamili yaye oya kumwa noyauda nai.
“Inatu hafela oinima oyo tai ulwa Seibeb koshiwana.
Oshike opolifi inai konga ofamili i tulombwele kutya okwa mangwa po manga ina holoka momhangu?” osho a pula ngaho.
Okwa ti kutya ofamili oya kala ashike ye lineekela moikundaneki opo i mone ouyelele.
“Katu shi kutya okwa idililwa peni.
Vamwe otava ti oku li kodolongo yevyulonghalo mOvenduka,” osho a ti ngaho.
Omupopiliko woministili youndjolowele nomayakulo opanghalafano Walters Kamaya okwa ti ota ti ko sha ashike koshikumungu eshi ngee a mono ouyelele wa wana.
Seibeb oo a dja kOmitara moshitopolwahoololo shaMaheke, oku na ounona vavali, kamwe oke na omido hamano omanga kamwe ke na nhatu.
Oye a kula puvamwaina aveshe.
Ofamili oya ti oku na ondjokonona youdu wopamadilaadilo, wa tameka konima yomido mbali.
Seibeb okwa kala kepango odula ya dja ko.
Meme waye, Katrina Seibes (51) Etitatu okwa lombwela oThe Namibian kutya opolifi mEtivali omutenya okwa li ye ya keumbo laye mOtjomuise i mu lombwele kutya omonamati okwa mangwa po nokwa holoka lwotete momhangu.
“Petameko lomwedi wa dja ko okwa li a tambulwa moshipangelo, nonghalo yaye oya ya nai konima aanya okunwa omiti.
Okwa ti ina hala okuvendwa ile okunwa eepela odo di na oilanduli,” osho a ti ngaho.
Katrina okwa pula kutya ohashi ende ngahelipi omonamati a kale te livake moshipangelo nonghee a ka hangika mEumbo lEpangelo nande omu na eameno la kwata moiti.
“Oudu waye wopamadilaadilo kakwa li nde u fatululilwa nawa koondokotola ndee eshi nda pula kutya oshike sha puka nokaana kange.
Okwa li nda lombwelwa ndi mu lombwele a nwe omiti.”
The post Ovakwapata vaSeibeb ova hala ouyelele we lixwa po appeared first on The Namibian.
