Eumbo la mwene womukunda la pya po

Festus Hamalwa

OKANKOLO- Mwene womukunda Omunduda u li moshikandjohoololo shaKankolo moshitukulwa shaShikoto okwa fiwa pomutenya eshi eumbo laye alishe la pya po.

Oshiningwanima osha ningwa Etivali efimbo lokonguloshi.

Kansela woshikandjohoololo shaKankolo Esra Ndaamekele okwa koleka onghundana ei onghela. Okwa yelifa ta ti mwene womukunda Andreas Kashuno okwa hangika ashike opo a nangala eumbo laye omwedi wa djako. “Okwa ninga mo ashike omwedi umwe meumbo laye,” ta ti. Okwa hokolola ta ti okwa li naye a fika oposhiningwanima eshi konima eshi a lopotelwa oshiponga shomundilo.

Kansela ou naye e li omukalimo womukunda omo okwa koleka ta ti oshiponga shomundilo osha etwa kokaana eshi kwa li taka twala omundilo kolupale.Otaku hokololwa kutya okwa li kuna omhepo, osho sha eta opo omundilo u nhukile keenduda ndele tadi tema.

Ndaamekele okwa ti omaliko ayeshe okwa pila meenduda.

Okwa hokolola ta ti meenduda di li mbali okwa li muna omakende eehaasa odo hadi di oshimoko shomwiifi.

“Omakende ayeshe okwa topa ndele ovaneumbo tava faduka po,” ta ti. Okwa weda po ta ti ovaneumbo inave shi pondola vali okukufa mo omaliko avo shaashi ova tila okutopelwa keehasha. 

Kansela okwa ti eehasha oda nyika oshiponga molwaashi ngeenge ohai di oshimoko shomwifi hai dulu okueta noupu oshiponga shomundilo. “Kape na omunhu a lopotwa a monifwa ile a dipaa komundilo ou,” ta ti.

Ndaamekele okwa pula moshiwana opo shi yambidide mwene womukunda ou noikulya osho yo oidjalomwa yovaneumbo.

“Ounona ova pumbwa omidjalofikola shaashi oda pila meenduda,” ta ti.

Okwa ti paife ovaneumbo ohava nangala ashike mepya koshi yomiti, vehe na oikulya.

Ovadali ova kumaidwa opo va xulife po okuumbateka ounona omindilo ile oupalwa molwaashi osha nyika oshiponga.

-fhamalwa@nepc.com.na

The post Eumbo la mwene womukunda la pya po appeared first on New Era.