‘Operation Basadi’ taka lwifa oimbuluma mOshikoto

Hambeleleni Daniel 

Opolifi moshitukulwa shaShikoto oya  nyamukula elombwelo laKakukutu komatanga opolifi Inspector General Anne-Marie Nainda eshi va tula moilonga oshikonga shokukondeka oimbuluma tashi ifanwa ‘Operation Basadi’. 

Oshikonga eshi osha tulwa moilonga Etitano nosha xula onghela onghela. 

Basadi okwa tulwa moilonga sha landula oSouthern African Regional Police Chiefs Co-operation Organisation (SARPCCO) mo 2022. 

Omukulunhu koshikondo shokukeelela oimbuluma moshitukulwa shaShikoto Deputy Commissioner Wynand Neels okwa holola kutya oshikonga ota shi ningwa nelalakano lokukeelela oimbula ya yooloka moshitukulwa. 

Opolifi mOshikoto,  oye li manga oukuni kumwe opo i kondjife oimbuluma moshitukulwa shavo.

  Neels okwa ti elalakano linene loshikonga eshi okushunifa oimbuluma pedu.

Okwa weda po ta ti oshikonga osha nunina yo okukaleka po eameno moshiwana ,okuxwaxwameka ovapolifi va longe nondjungu .

Omutwe woshikondo shokukondjifa oimbuluma owa holola kutya otava ka enda neekamba okutala eendingosho odo tadi landifa omalodu dihe na omikanda nokukonakona ovanhu ovo va veli koshi yodungo. 

Ekondjifo loimbuluma oli li koshi yoshipalanyole, ‘ovakainhu veli manga kumwe opo va kondjife oimbuluma nokukala va amenwa.

Omaandaxa ova li pomuvelo woku ya koushimba, pOshivelo nelalakano okukondjifa oimbuluma nokukaleka po omilandu domeedjila, va kwashilipaleke kutya ovakwashiwana ove di shikula ngaashi okutala ovanhu ovo tava shingi veli koshi yodungo naava vehe na omikanda dokushinga. 

Okwa ti ovapolifi vovakainhu ova fimana okukala metanga lopolifi molwaashi otava keelele oimbuluma, tava kwatele po oveta ,nokukaleka oshiwana sha amenwa.

Oshikonga eshi osha teelelwa Eindi shika ete po elunduluko moshiwana, elongelo kumwe pati kovakwashiwana nopolifi osho yo okuxwepopaleka oimbuluma pedu moshitukulwa. 

Opolifi oya indila ovakwashiwana opo veli ufe komilandu odo da tulwa po, okulongela kumwe nopolifi opo va kale tava lopota oimbuluma oyo tai li nyenge momidingonoko davo.

–hambelelenidaniel56@gmail.com

The post ‘Operation Basadi’ taka lwifa oimbuluma mOshikoto appeared first on New Era.