Ngurare ota indile opo osystema yopainiwe i kwatele mo aveshe,i kale yopaunhu
Omuprima minista Elijah Ngurare okwa indila opo osystema yopainiwe i kwatele mo aveshe nokukala yopaunhu, ta indile oBank of Namibia nomahangano opainiwe a kale haa tale komaxupilo ovanhu ngee taa ningi omatokolo. Ngurare omapopyo aa okwe a ninga pefimbo leenghundafana newiliko novanailonga voBank of Namibia mOvenduka Etitatu, oko a ti kutya ombaanga ya kula yoshilongo […] The post Ngurare ota indile opo osystema yopainiwe i kwatele mo aveshe,i kale yopaunhu appeared first on The Namibian.
Black News 
Omuprima minista Elijah Ngurare okwa indila opo osystema yopainiwe i kwatele mo aveshe nokukala yopaunhu, ta indile oBank of Namibia nomahangano opainiwe a kale haa tale komaxupilo ovanhu ngee taa ningi omatokolo.
Ngurare omapopyo aa okwe a ninga pefimbo leenghundafana newiliko novanailonga voBank of Namibia mOvenduka Etitatu, oko a ti kutya ombaanga ya kula yoshilongo oyo ehangano la fimana nokuyukililifa onakwiiwa yeliko loshilongo.
“Opu na omahangano oo omunhu ha talele po naao omunhu e na owino yao.
Okwa li nda dimbulukifwa kutya oBank of Namibia kai shi ashike onhele yokuninga omatokolo, ashike onhele oyo ye lineekelwa nonakwiiwa yeliko letu omo hai yukililifwa,” osho a ti ngaho. Manga ta tambula ko oshinakuwanifwa sha kula shombaanga mokukaleka po onghalo yoshimaliwa i li xwepo, Ngurare okwa ti nakutalwe nawa nghee omatokolo opashimaliwa taa kumu onghalafano, unene ngaa moinima ya kwatela mo okukufa ko omaumbo ovanhu.
Okwa ti omahangano oiniwe naa konge po omikalo dimwe ngee oovene vomaumbo va dopa okufuta, mwa kwatelwa nomikalo odo tadi pitike a mone kosha koimaliwa yavo.
“Natu kale tu na eenghundafana odo di na nouwa wovanhu tete.
Oo taku fwa oinima naye omunhu ashike ngaashi fyeni,” osho a ti ngaho.
Ngurare natango okwa holola omalimbililo kombinga yeemhito dokumona omikuli domaumbo, ta pula kutya omolwashike omukalo oo hau longifwa okufuta oihauto itau dulu okulongifwa komaumbo.
Okwa ti oshinima eshi osha pumbwa eenghundafana pokati kombaanga ya shiya ko, omahangano oiniwe novatotiveta kutofwe mo omilandu daalushe di li xwepo.
Omuprima minista natango okwa yeleka efimano lomahangano a kola taa pula komesho mokuhanga ondjodi yeyambukepo laNamibia koshi yomukandafaneko womayambukepo opashiwana omutihamano.
“Eshi hatu pula komesho nomayambulepo etu opashiwana, eyokomesho letu loshili otali ka vixwa taku talwa nghee omahangano a yambula po omaxupilo, aa lula ongushu younhu nokuwedela eemhito dOvanamibia aveshe,” osho a ti ngaho.
Ngurare natango okwa pandula oBank of Namibia eshi ya tambula ko eduto loinima ipe, enghonopeko lovanyasha nonghatu iwa yopailonga, ta ti eenghendabala edi oda fimana mokutunga eliko lakola la kwatela mo aveshe.
Okwa popya yoo vali kefimano loukumwe nelongelokumwe moikondo aishe, ta indile Ovanamibia va longele kumwe opo va yambule po eyokomesho lopashiwana tali kalelele.
–NAMPA
The post Ngurare ota indile opo osystema yopainiwe i kwatele mo aveshe,i kale yopaunhu appeared first on The Namibian.
