Oipangelo ya udanekwa natango kai wetike
Epangelo natango inali tunga nokuwedela oipangelo i li itanho oyo la udaneka kOndangwa, koNkurenkuru, kOtjiwarongo, koGobabis nokOvenduka – pamhito imwe, okonima nokuli yomido 19. Oipangelo inai pwa, itai i komesho naimwe inai tamekwa nokuli natango konima epangelo la shiivifa omafaneko ayo pokati komudo 2007 nomudo 2024. Omupopiliko woministili youndjolowele, Walters Kamaya, Etivali okwa ti eepoloyeka […] The post Oipangelo ya udanekwa natango kai wetike appeared first on The Namibian.
Black News 
Epangelo natango inali tunga nokuwedela oipangelo i li itanho oyo la udaneka kOndangwa, koNkurenkuru, kOtjiwarongo, koGobabis nokOvenduka – pamhito imwe, okonima nokuli yomido 19.
Oipangelo inai pwa, itai i komesho naimwe inai tamekwa nokuli natango konima epangelo la shiivifa omafaneko ayo pokati komudo 2007 nomudo 2024.
Omupopiliko woministili youndjolowele, Walters Kamaya, Etivali okwa ti eepoloyeka dokutunga nokuwedela oipangelo inadi pwa molwomumbwe yoshimaliwa, ovo va kwata eetendela tava dopa okuwanifa po oilonga, onghalo yeliko mounyuni nomakateko a etwa koKolona.
“Oministili youndjolowele, paenghundafana noministili yoshimaliwa, otai kufa oshimaliwa momutengenekwafaneko woneudo,” osho a ti ngaho.
Oshipangelo shokutumina ovanaudu kOndangwa, osho kwa li tete sha fanekwa shi tungwe momudo 2007, okwa li sha tumbulwa kutya oshi li omumbwe yakula kouvalelo wokwoongela oshimaliwa komaulikilo opaipindi kOndangwa Olomakaya la dja ko.
Oshipangelo okwa li sha tengenekwa kutya otashi ka pula eemiliyona N$100 momudo 2015.
Hamushandjai wehangano lovapangi moNamibia, Junias Shilunga Omaandaxa okwa ti oshiwana oshi shi shii kutya epangelo inali tunga oshipangelo nande oshimwe, oko ovanadu tava dulu okutuminwa nghee oshilongo sha mangulukile.
“Eshi otashi kumwifa neenghono, unene ngaa konima yomido 36 demanguluko,” Shilunga ta ti.
Okwa ti oshilongo natango osha tala ashike moipangelo ya kulupa oyo ya tungwa kepangelo lokatongotongo, nande oshilongo oshi na omwaalu wovanhu tau i pombada.
Onhele opo tapa tungwa oshipangelo kOtjiwarongo oya yandjwa nodalate oya tulwa ko. Ashike opoloyeka oya fiwa ashike opo.
Shilunga okwa itavela kutya edi eepoloyeka da fimana odo tadi dulu okuyakula mo oipangelo yaVenduka oyo hai kala ihadi neenghono.
“Lipula ashike omunaudu ta luluma ta edifwa eevili di dulife pomulongo e li mobesha ta di koKatima Mulilo a yuka kOvenduka a ka mone omayakulo opaunamiti,” osho a ti ngaho.
Omukalimo wokoNkurenkuru, George Dinyando, okwa ti omakateko okutunga oshipangelo aa kuma ovakalimo vomoshitopolwahoololo nai.
“Ovakainhu vamwe ohava monene ounona meendjila, omanga vakwao hava mono oixuna oyo tai dulu okukelelwa,” osho a ti ngaho.
Omukalimo womoshitopolwahoololo shaHangwena, Laimi David, oo ha ende eekilomita di li 80 okuya kOnandjokwe, okwa ti oshidjuu nosha nyika oshiponga neenghono.
“Ovakainhu ve li momateelelo ohava fininikwa va ende oinano ile va ka mone omayakulo, osho shi lolola nosha nyika oshiponga neenghono.
Oshiluluma nokashi li pauyuki eshi oipangelo i li komakule novanhu,” osho a ti ngaho.
The Namibian momudo 2017 okwa lopotele kutya eemiliyona didulife puN$4 oda longifwa nale momalolelokonakono okutunga oshipangelo osho tashi kala hashi tuminwa ovanaudu kOndangwa.
Oshipangelo okwa li kwa fanekwa kutya otashi ka yakula mo Onandjokwe oyo kwa li ya tungwa momudo 1911 kOniipa moshitopolwahoololo shaShikoto.
Kamaya okwa ti oministili otai ningi omalunduluko omalolelokonakono oipangelo kOndangwa nokoNkurenkuru.
Koshitopolwahoololo shaMaheke ewedelo loshipangelo shaGobabis, olo kwa li la shiivifwa momudo 2020, ola shakeneka omakateko ahapu.
Noshipangelo osho sha fanekwa tashi tungwa mOvenduka koHavana, tashi pula oimaliwa ihapu natango oilonga yasho kai na apa yaya nandenande.
The post Oipangelo ya udanekwa natango kai wetike appeared first on The Namibian.
