‘Omufekelwa medhipago lyaShiweda namangululwe mo mondholongo’
Ngoka ta fekelwa edhanonkandangala enene medhipago lyaJustine Shiweda, okwa lombwele ompangu mEtitano kutya kashili pauyuuki okukaleka omutekulu gwe mondholongo molwashoka kena ondjo meponokelo lyaShiweda. Ndhoka Abner Mateus okwe dhi popi pethimbo lyiihokolola yomutekulu gwe Petrus Shikwaya monkambadhala yokupewa oboloha, mEtitano mOmpangu yaMangestrata gwaNdangwa. Shikwaya(22) gumwe gwomaafekelwa yahamano mboka taya tamanekelwa olunyala meponokelo lyomutamaneki gwomOndangwa, Shiweda, […] The post ‘Omufekelwa medhipago lyaShiweda namangululwe mo mondholongo’ appeared first on The Namibian.
Black News 
Ngoka ta fekelwa edhanonkandangala enene medhipago lyaJustine Shiweda, okwa lombwele ompangu mEtitano kutya kashili pauyuuki okukaleka omutekulu gwe mondholongo molwashoka kena ondjo meponokelo lyaShiweda.
Ndhoka Abner Mateus okwe dhi popi pethimbo lyiihokolola yomutekulu gwe Petrus Shikwaya monkambadhala yokupewa oboloha, mEtitano mOmpangu yaMangestrata gwaNdangwa.
Shikwaya(22) gumwe gwomaafekelwa yahamano mboka taya tamanekelwa olunyala meponokelo lyomutamaneki gwomOndangwa, Shiweda, moshiningwanima shoka sha ningwa muKotoba omumvo gwa zi ko.
Epangelo otali tamaneke kutya hekulu gwaShikwaya, Mateus, oye u unganeke eponokelo ndyoka eshi ningi e li mondholongo.
Poshiponokela shoka otaku hokololwa Shiweda(32) a yahwa lwiikando iheyali nokwa tilwa uuzigo.
Okwa mana oondjenda numvo muFebuluali.
Epangelo olya popi kutya Mateus okwa li a lombwele Shikwaya a tumine Petrus Uusiku oshimaliwa shooN$1 200 shi ka lande uuzigo mboka lwanima wa tilwa Shiweda pethimbo lyoshiponokela.
Pethimbo lyiihokolola yomEtitano, Mateus okwa lombwele ompangu kutya okwa li a holeke okutseyithila Shikwaya kutya okuli mondholongo – muule woomvula ndatu ndhoka a kala mondholongo okuza sho kwa li a tulwa miipandeko muNovemba 2022 ta tamanekelwa iipotha yuukengeleledhi.
“Sho nda kala mondholongo, ka ndali nande nda hala ya tseya mpoka ndi li. Kandali nda hala ya mona kutya onda tulwa miipandeko.
Okwa li owala nda hala ya tseya kutya ondili mongeshefa yokulanda nokulanditha iinima,” osho Mateus a lombwele ompangu ngaaka.
Okwa popi kutya oonkundathana pokati kawo naShikwaya kadha li nande dhi nasha nompangela yoshiponokela shaShiweda.
“Kapwa li nande oshikando shimwe nda popya naye kombinga yiipotha yandje naye. Kali nande eshi ngele onda kwatwa po ndili mondholongo nondatililwa oboloha.
Oshikando shotango a tseya kutya nani ondili mondhongolo, oosho twa tsakanene naye mOvenduka.
Okwa li a pula ndje omapulo nonde mu lombwele kutya okwa li nda kala mondholongo nonda mangululwa mo koboloha,” osho Mateus a lombwele ompangu natango ngaaka.
“Kashi li pauyuuki okukaleka omuntu mondholongo keena ondjo ya sha,” osho Mateus a gwedhapo.
Omapiyagano okwa li ga holoka mompangu sho aakwanezimo ya nakusa Shiweda ya tameke okulila nokupula omapulo kutya omolwashike omupambele gwawo a dhipagwa iipundjamenye.
Ompangu okwa li nokuli ya kalekwa othika manga uule wominute ntano.
“Okwa dhipaga mumwamemekadhona gwandje miinima yowala,” osho mumwamemekadhona gwa nakusa Shiweda a popi ngaaka.
‘KANDINA ONDJO MEDHIPAGO’
Metine, Shikwaya okwa lombwele ompangu kutya ke na ondjo medhipago lyaShiweda.
Omutamaneki gwepangelo Yukai Kangira okwa lombwele ompangu kutya Shikwaya ita opalele okupewa oboloha.
“Ngame kandi na mo nande olunaya medhipago lya Justine Shiweda,” osho Shikwaya a lombwele ompangu ngaaka.
Ashike nando ongaaka, Kangira, okwa popi kutya Shikwaya okwa dhana onkandangala medhipago ndyoka.
“Ongoye wa landa oshihauto shoka sha longithwa okweeta uuzigo konooli, ishewe ongoye kwa li wa tumu oshimaliwa shoka sha landa uuzigo mboka wa longithwa mokudhipaga Justine,” osho Kangira a popi ngaaka.
Shikwaya okwa popi kutya kali nande eshi ngele opuna ompangela yasha, nokwa gwedhapo kutya kali eshi kutya oshimaliwa shoka a tumu otashi ka longithwa shike, ishewe kali nande e na ekwatathano naangoka a tumine oshimaliwa.
“Ngame onda tumu owala oshimaliwa ngaashi nda lombwelwa kuAbner Mateus,” osho a popi ngaaka.
“Ngame kandi na mo nande olunyala lwa sha moshiningwanima shoka.
Inandi dhipaga omuntu, ishewe inandi kutha ombinga mondungethaneko yokuponokela nenge yokudhipaga Justine.
Itandi kalelepo oshinima inaandi shi ninga,” osho Shikwaya a popi ngaaka.
The post ‘Omufekelwa medhipago lyaShiweda namangululwe mo mondholongo’ appeared first on The Namibian.
