Omafyo a hapupala mexuliloshivike lomailikano 

Opolifi oya lopota oiningwanima yomafyo ya fika po 11 mexuliloshivike omo mwa kwatelwa omafyo oipundjamene,  tamu wedwa yo oiningwanima yomahepeko omomaumbo osho yo opaihole, oku li dipaya noibofa ikwao ya wedwa po ngaashi oulunga woimuna.

Omafyo

Moshiningwanima shimwe omwa lopotwa ovalumenhu vatatu veli kufa eemwenyo eshi ve li mangeleka. 

Omulumenhu weedula 42 okwe li tuwa a xulifa eshi e li mangeleka. Oshiningwanima osha ningilwa momukunda Oothadhambuku moshitukulwa shaShikoto, Etitano lwopo 11h00. 

 Oshiningwanima sha faafana, omulumenhu weedula 25 okwa xulifa eshi naye e li mangeleka. Eshi osha ningilwa molukanda Ombili moWindhoek efimbo lokeengulasha. Omanga olutu lomulumenhu weedula 45 le li tuwa la ninga nai eshi vati e li kufa omwenyo momukunda Onghudi moshitukulwa shaHangwena. Nakufya vati okwa li omunailonga womeumbo nokwa li a kala meumbo oye auke.

Ka kele kelimangeleko, Omupopiliko wopolifi Commissioner Kauna Shikwambi okwa holola kutya vamwe ova kanifa yo eemwenyo davo mexuliloshivike eshi ve li twa neembele. 

Omulumenhu weedula 24 okwa lopotwa a tuwa nombele kumukwao konima eshi vali tava nyenyeta. 

Opolifi oya holola kutya enyenyeto lavo ola eta fiyo tave li kumu kolutu ndele nakuningwa oshihakanwa ta tuwa nombele nokuxulifila poshiningwanima. Opolifi oya yelifa kutya natango olutu lokaana keedula 11, ole li tuwa kounona voukadona ovo vali tava lifa momulamba koshi yonopa yaOanob moRehoboth. 

Nakufya oo ali mondodo onhinano ko Rehoboth okwa ninga efiku ehe wetike, notaku hokololwa ina fika keumbo okudja kofikola Etitano fiyo olutu laye le li tuwa. 

Opilifi oya yelifa kutya nakufya okwa  hangika ena omadidimika kolutu laye nomakonakono opolifi otaa twikile. 

KoMondesa moWalvisBay, omumati weedula 16 okwa lopotwa a kanifa omwenyo waye eshi a tuwa nombele komukwao weedula 17 eshi vati vali tava tanguna. Otaku hokololwa omufeekelwa eshi a twa oshihakanwa a kendabala okufaduka po ashike okwa ka kwatwa keemwiya dashinana nokuli konima yekumba. 

Moshiningwanima sha yooloka, Omulumenhu weedula 46 okwa xulifa eshi vati e li yasha nondjebo. Opolifi oya holola kutya omulumenhu okwa yasha tete omukainhu waye weedula 43 nondjebo ndele ta taalelifa vali ondjebo muye noku li yasha. 

Aveshe, ova li va twalwa koshipangelo shaKongo va ka mone ouhaku nokutuminwa koshipangelo shaNgela opo va ka mone ouhaku wa wedwa po ashike omulumenhu okwa ka xulifa nomukainhu ota mono natango epango. 

Oshingingwanima eshi osha ningilwa molukanda ha li ifanwa Shapopi, mOkongo moshitukulwa shaHangwena, sha ningwa Olomakaya lwopo 10h00 lwaapo. 

Olutu lomukulupe weedula 61 ole li tuwa pondje yonduda yaye yokunangala kovashiinda moSchlip moshitukulwa shaHardap.  Otaku hokololwa nakufya a li ena ounghundi yonhumba. 

Oiponga yomeendjila

Okaana keedula heyali oka xulifa eshi ka lya twa vati kotuwa Olomakaya pokati kopate yOnhuno nEndola lwopo 12h45. Otaku hokololwa vati okaana ka tondokela mopate, osho sha eta ka lya twe nokuxulifila poshiningwanima. 

Omulumenhu weedula 28 okwa xulifa eshi otuwa yeli denga metemba olo la li la umbatwa kotuwa yobakie. Omushingi wotuwa e i yeli denga metemba okwa mangwa po nomakonaakono opolifi otaa twikile. 

Omahepeko 

Omulumenhu weedula 33 okwa tulwa moipandeko sha landula eshi a ponokela nokudenga omukainhu waye weedula 43 nomalyenge. Otaku hokololwa omukainhu a dengwa vati nelyenge olutu alishe nokwa mona oshiponga. 

Omukainhu weedula 40 ota mono epango lopaunamiti eshi a tuwa vati nombele oikando ihapu komulumenhu waye. 

Oshiningwanima eshi osha ningilwa moGrootfontein Olomakaya po01h00 lwaapo. 

Moshiningwa shikwao, omufekelwa umwe okwa tulwa moipandeko eshi vati a tila nokuxuka nakuningwa oshihakanwa nombiya yoifima oyo ya li pediko. 

Otaku hololwa nakuningwa oshihakanwa a pya moshipala, keenyala osho yo komaulu nota mono epango lopaunamiti moshipangelo.

–taimihaihambo2000@gmail.com 

The post Omafyo a hapupala mexuliloshivike lomailikano  appeared first on New Era.