Va kunghililwa va xulife po okulandifila pomunghulo wopate 

ONDANGWA-Ovalandifi vomomapandaanda mOndangwa ova kunghililwa opo va xulife po okushingifa popepi nopate noku ya komatala opo va landife oilandifomwa yavo va manguluka. 

Ovalandifi ova pewa fiyo okexulilo la Septemba opo va fiye po opo veli kufila okulandifila, pomunghulo wopate nokuninga omaindilo okulandifa komatala. 

Elelo lodoolopa yaNdangwa ola li la ongaleka ovalandifi vomomapandaanda osho yo ovashingi veetaxi opo va ndungikwe nghene sha nyika oshiponga okulandifila pomunghulo wopate 

Oshiongi eshi okwa li sha ningwa, sha landula oshiponga osho sha holokele modoolopa eshi obesa ya wa kopate nokulidenga movalandifi vomomapaanda ovo hava landifile pomunghulo wopate ndele tashi twaalele omwenyo womulandifi umwe navakwao vamwe ova mona oiponga.

Oshiongalele, okwa li sha etelela ovanambelewa vopolifi. Opolifi oya yandja ehonga moshiwana nghene shi na oku li kaleka kokule noiponga yolundi eli.

Mayola wodoolopa yaNdangwa Ester Auala okwa ti otava longele kumwe nopolifi opo va kwafele ovalandifi vomomapandaanda va kale veli keenhele da amenwa. 

Okwa ti ovalandifi ova pumbwa ashike okuninga omaindilo okulandifa momatala kombelewa ya kansela.

“ Oha tu longekinda eenhele da amenwa opo eenghalamwenyo dovalandi novalandifi di kale dili meameno” Auala ta ti.

Mayola okwe va kunghilila kutya hamunhu taka hangika ta landifile ponhele opo kwa li pa ningilwa oshiponga nau ta ka hangwa po ota ka tulwa konima yekumba. 

Auala okwa indila ovalandifi opo ve li didimike omanga odoolopa tai ningi nawa omatala. 

Ashike nande ongaho, ovalandifi vomomapandaanda vamwe po ova lya meenyandi molwaashi vati ka kwali ve li longekinda okukala va fiya po eenhele davo opo hava landifile paife.

Julia Kakololo oo naye eli omulandifi womomapandaanda okwa hokolola ta ti epangelo oli li ashike ha li va ningile omaudaneko ndele iha li m a wanifa po.

Okwa ti ngaashi ngaho ina li va yelifila nawa kutya okudja apa nava uke peni. 

Umwe vali, Imanuel Ndatyapo okwa ti okukala va twalwa keenele dipe ngaashi komatala oko otashi va nyonene vati eengeshefa davo molwaashi komatala kaku na ovalandi ko kaku na eenhele do ku fikama eetuwa.

Okwa weda po vali nokutya omatala amwe kae na oukoshoki nga ashi oudjuo vokulongifa pefimbo eshito ta li pula.

Epitania Jonas okwa pula ovaleli vodoolopa opo va kale va tula eenhele domalandifilo pamufika uli nawa.  

Jonas okwa indila elelo lodoolopa opo li tule po ngaho nande oshinima sha shangwa kutya omatala onhele yomalandifilo osho tashi dulu okupukulula nokunana ovalandi.

Omupopiliko wopolifi yaShana Chief Inspector Thomas Aiyambo okwa kunghilila ovalandifi opo va kale hava landifile peenhele da amenwa ndele hakeshe ashike apa va hange. 

Okwa ti ovalandifi novashingi vomopate ova pumbwa okukala tava longele kumwe opo va kaleke po eameno lavo.

–hambelelenindaniel56@gmail.com

The post Va kunghililwa va xulife po okulandifila pomunghulo wopate  appeared first on New Era.