Oilongo yovanhu ihai likolwa matanga

Ongudu ya shikula ko yOvanamibia ovo tava kufwa koSouth Africa va alukile keumbo oya teelelika i fike moshilongo mEtitano, 17 Juli.

Minista womatembu Lucia Iipumbu okwa ti epangelo otali ka vatela Ovanamibia ovo ve li kondje yoshilongo opo tashi shiva naapo sha pumbiwa.

“Paife, ongudu yOvanamibia oi li moSouth Africa, unene ngaa moCape Town noPort Elizabeth, ye lipyakidila nomilandu dokukonakona.

Omwaalu wovakwashiwana ovo tava alulilwa keumbo otau ka yandjwa ngee omakonakono a manifwa,” Iipumbu ta ti.

Edi okwe di popya petambuleko longudu yOvanamibia ve li 71 ovo ve ya keumbo Oshoondaxa.

“Vahapu vomwaavo ve ya keumbo ove lihanga monghalo itai lididimikilwa moSouth Africa, mwa kwatelwa onghalo idjuu yopamaxupilo noikumungu ikwao oyo ya fininika epangelo li va kufe ko ve uye keumbo,” Iipumbu ta ti.

Minista okwa ti Ovanamibia ovo tava i kondje yoshilongo nave liufe komilandu domatembu ndee tava kala mekwatafano neembelewa doshilongo koilongo oko.

“Nande ovakwashiwana vahapu otava i kondje yoshilongo va ka konge omaxupilo, osha fimana ve shi ninge okupitila momilandu dopaveta nomalalakano omondjila,” osho a ti ngaho.

The post Oilongo yovanhu ihai likolwa matanga appeared first on The Namibian.