One Economy Foundation ota longifa omaudano a ungaunge nomikundu dopanghalafano

Ehangano ledina One Economy Foundation otali longifa omaudano neenghundafana da manguluka li yandje omauyelele kombinga youndjolowele wopamadilaadilo, omilele da amenwa, omahepeko opaukashikekookanhu nomadipayo ovakainhu moshivilo shalo shomaudano osho tashi ya.

Oshivilo otashi ka ningwa mOvenduka kokapale koIndependence momafiku 22 Auguste, otaku ka lotokwa oshinano sheekilomita 5 no10 pamwe noinyangadalwa yeefamili neenghundafana tadi lalakanene okutwa ovanhu omukumo va kufe ombinga mokuungaunga noikumhungu tai hepeke oshiwana.

Omupopiliko wehangano eli Paulina Moses okwa ti opolohalama ei otai lalakanene okutota omhito omo ovanhu tave ya kumwe okupitila momaudano manga tava kundafana oinima ya fimana.

“Opolohama ei oi na sha nokweeta ovanhu pamwe okupitila momaudano, eefamili neenghundafana dokuyandja omauyelele a dingilila oundjolowele wopamadilaadilo, omilele da amenwa nomumbwe yokuxulifa po omahepeko opaukashikekookanhu nomadipayo ovakainhu,” Moses ta ti.

Okwa ti ehangano ola hala ovakufimbinga va ka dje koshivilo eshi noshinakuwanifa shokweeta elunduluko momundingono wavo.

“Otwa hala keshe oo e tuwaimina aha dje ko ashike eenyala dongaho, ashike na dje ko a nghonopekwa a kufe ombinga melunduluko,” osho a ti ngaho.

Ovalumenhu otava ka mona omhito yokukundafana kombinga youndjolowele wopamadilaadilo nomilele da amenwa, manga yo tava popi oshinakuwanifa shavo shokukelela omahepeko oukashikekookanhu nomadipayo ovakainhu.

Eenghundafana otadi ka tameka po08h30 notadi ka kala di na ovakwatelikomesho va yooloka.

Okulotoka otaku ka kwatela mo eekilomita di li 5 fiyo 10, noshimaliwa shokulishangifa oshi fike poN$120 noN$180. Otaku ka findanwa eembadi kwaavo tava ka mana ko oinano ei.

Oshivilo otashi ka kwatela mo yo omalinyanyudo, oinyandalwa yomayandjo omauyelele, omaudano ounona noinyangadalwa yeefamili nomahangano.

Ehangano ola ti oshivilo otashi lalakanene okutota omahongo manga yo tashi tu ovakufimbinga omukumo va kufe ombinga meenghendabala dokutunga po omidingonoko di na oundjolowele noda amenwa.

The post One Economy Foundation ota longifa omaudano a ungaunge nomikundu dopanghalafano appeared first on The Namibian.