Oshikondo shomahoololo nashi nghonopekwe – Sindano

Okomisi yOmahoololo yaNamibia oya ti okunghonopeka oshikondo shomahoolo shi dule okuungaunga nokuwilika omikundu keshe tadi holoka, oshinima sha fimana mokwaamena elineekelo loshiwana moudemokoli. Unene ngaa eshi oinima ihapu tai lunduluka mounyuni.

Omunashipundi wokomisi ei Gerson Sindano edi okwe di popya Omaandaxa pepatululo pambelewa loshoongaleleilonga tashi yandje omadeulo e na sha newiliko nenyamukulo lomikundu la nuka po mOvenduka.

Sindano okwa ti oushili womahoololo inau fimana ashike molwelineekelo loshiwana ashike owa fimana yo mokuxwaxwameka ekufombinga loshiwana nelongelokumwe lopanghalafano.

“Pakutala elunduluko mopolitika nomakulukuto ahapupala mounyuni, ewiliko nekandule po lomikundu la nuka po oshinima sha fimana,” osho a ti ngaho.

Okwa ti omadeulo otaa yandje owino kovanambelewa vomahoololo nomikalo da nuka po da pumbiwa mokutofa mo oinima inai yela nawa nokunyamukula komikundu odo tadi dulu okupiyaaneka omilandu domahoololo pefimbo.

Sindano okwa indila ovakufimbinga va paafane ounongo ndele tava eta po omilandu dipe noda nuka po dokunghonopeka oikondo yewiliko lomahoololo.

Sindano okwa ti omahoololo naa kale pauyuki, pauyelele ndele taa kwatele mo ovanhu aveshe, ta weda po kutya keshe ewi nali valulwe.